Guztion sormenarekin euskara aurrera sarean

Sortu, berrerabili eta partekatu. Azken finean hauxe da egin behar dena euskarak sare sozialetan bere lekua izan eta, ahal den heinean, hedatu ahal izateko. Hau izan zen pasa den uztailaren 12 eta 13an, Donostiako Miramar Jauregian, “Euskara 2.0” Uda Ikastaroan atera zen ondorio nagusietako bat.

Euskarak, egun hain arin hedatzen ari diren sare sozialetan, aurkitu ditzakeen oztopo guztiak erronka bihurtzen dira Interneten eta horregatik edukiak sortu beharra dago. Kasu honetan, kalitatea baino kantitatea izango litzateke garrantzitsuagoa. Hasierako fase baten bai behintzat.

Ildo honetik, gauzak egin ahala hobetuz joango dira, beti ere, aurretik aipatutako berrerabilpenaren ideia martxan jartzen bada. Sorkuntza lan honetarako, Internetek hainbat doako tresna eskaintzen ditu. Ezagutu, menperatu eta landuz gero aukera izugarriak ematen dituela konturatuko gara.

Honela, kontutan izan behar da sarean ez dela existitzen hizkuntza minoritariorik baizik eta erabilpen gehiago edota gutxiago duten  hizkuntzak. Horregatik sorkuntza da gakoa. Ekoiztu beharra dago. Eta, era berean, guk sortutakoa kontsumitzearen aldeko apustua egin, besteek egindakoa kontsumitzerakoan gure hizkuntzaren etorkizuna kolokan jartzen delako.

Gainera, ez da sekulako proiekturik eskatzen, gauza txikiekin ere, gauza handi asko lor daitezkeelako.

Hainbat arlo daude jorratzeko eta hainbat tresna eskuragarri. Ekin diezaiogun bideari. Ahal dugun heinean, sortuz. Ahal dugun heinean, euskaraz.

 (Unai Cuevas Arano, Eusko Jaurlaritzako Liburutegi zerbitzuaren teknikaria)

Informazio gehigarria:

• EHUko Uda Ikastaroak: Euskara 2.0  (Maite Goñi)
• Euskara 2.0 ikastaroaren gunea
• EHUko XXIX. Uda ikastaroak